ആധാർ ഉണ്ടെങ്കിൽ സ്കൂട്ടർ ഫ്രീ! വാഗ്ദാനം നരേന്ദ്ര മോദിയുടേതെന്ന് പ്രചാരണം; സംഭവത്തിന് പിന്നിലെ സത്യമിതാണ്

പ്രധാനമന്ത്രി നരേന്ദ്ര മോദി സ്ത്രീകൾക്ക് ആധാർ കാർഡ് ഉപയോഗിച്ച് സൗജന്യമായി സ്കൂട്ടർ നൽകുന്നുവെന്ന് സോഷ്യൽ മീഡിയയിൽ ഒരു വീഡിയോ പ്രചരിക്കുന്നുണ്ട്. ഇതൊരു പുതിയ സർക്കാർ പദ്ധതിയാണെന്നും വീഡിയോ അവകാശപ്പെടുന്നു. എന്നാൽ ഈ പ്രചാരണം പൂർണ്ണമായും വ്യാജമാണ്.

ഈ വിഷയത്തിൽ പ്രസ് ഇൻഫർമേഷൻ ബ്യൂറോ (പിഐബി) ഔദ്യോഗികമായി വിശദീകരണം നൽകിയിട്ടുണ്ട്. ആ വീഡിയോ നിർമ്മിച്ചത് ആർട്ടിഫിഷ്യൽ ഇൻ്റലിജൻസ് (എഐ) ഉപയോഗിച്ചാണെന്നും, കേന്ദ്ര സർക്കാർ ഇത്തരത്തിലൊരു പദ്ധതിയും പ്രഖ്യാപിച്ചിട്ടില്ലെന്നും പിഐബി വ്യക്തമാക്കി.

സർക്കാർ ക്ഷേമപദ്ധതികളെക്കുറിച്ചുള്ള വിവരങ്ങൾ അറിയാൻ ഔദ്യോഗിക വെബ്സൈറ്റായ MyScheme മാത്രം ഉപയോഗിക്കണമെന്ന് കേന്ദ്രസർക്കാർ ജനങ്ങൾക്ക് നിർദ്ദേശം നൽകി. സോഷ്യൽ മീഡിയയിൽ വരുന്ന വീഡിയോകളും വാർത്തകളും ഉറപ്പുവരുത്താതെ വിശ്വസിക്കരുതെന്നും മുന്നറിയിപ്പ് നൽകിയിട്ടുണ്ട്.

രാഷ്ട്രീയ നേതാക്കളുടെ ശബ്ദവും മുഖവും വ്യാജമായി നിർമ്മിക്കാൻ എഐ സാങ്കേതികവിദ്യ ഉപയോഗിക്കുന്നത് ഈയിടെയായി വർധിച്ചിട്ടുണ്ട്. ഇത് തെറ്റായ വിവരങ്ങൾ അതിവേഗം പ്രചരിക്കുന്നതിനും ജനങ്ങളെ തെറ്റിദ്ധരിപ്പിക്കുന്നതിനും കാരണമാകുന്നു. 

ഔദ്യോഗിക അറിയിപ്പുകളില്ലാതെ വരുന്ന ഇത്തരം വാഗ്ദാനങ്ങൾ വിശ്വസിക്കാതെ ജാഗ്രത പാലിക്കുന്നതാണ് സുരക്ഷിതം.