ക്യാബേജ് വൃത്തിയാക്കുമ്പോൾ ഇക്കാര്യങ്ങൾ ശ്രദ്ധിക്കണം

മിക്ക വീടുകളിലും സാധാരണയായി ഉപയോഗിക്കുന്ന പച്ചക്കറികളിൽ ഒന്നാണ് ക്യാബേജ്. ശൈത്യകാലത്ത് ഭക്ഷണത്തിൽ ഉൾപ്പെടുത്തേണ്ട ഒരു പ്രധാനപ്പെട്ട വിഭവവും ആണിത്. തോരൻ, സാലഡ് ഇങ്ങനെ പ‌ലതിലും ക്യാബേജ് ചേർക്കാറുണ്ട്.

ക്യാബേജിൻ്റെ രുചിയും ആകൃതിയും എല്ലാം നമ്മെ ആകർഷിക്കാറുണ്ടെങ്കിലും ഉയർന്ന അളവിൽ കീടനാശിനികളും മറ്റും ഉപയോഗിക്കുന്ന പച്ചക്കറി കൂടിയാണ് ഇത്. ഉയർന്ന അളവിൽ രോഗം പരത്തുന്ന വസ്തുക്കളും അണുക്കളും ഒക്കെ അടങ്ങിയിരിക്കുന്ന പച്ചക്കറി കൂടിയാണ് ക്യാബേജ്. അതുകൊണ്ടു തന്നെ ക്യാബേജിൻ്റെ ഓരോ പാളിയും കൃത്യമായി വൃത്തിയാക്കേണ്ടതുണ്ട്. ക്യാബേജ് വൃത്തിയാക്കുമ്പോൾ ചില കാര്യങ്ങൾ പ്രത്യേകം ശ്ര​ദ്ധിക്കണം.

ആദ്യം പുറത്തെ ഇലകൾ നീക്കം ചെയ്യുക. പുറം ഭാ​ഗത്തെ രണ്ടോ മൂന്നോ ഇലകൾ മാറ്റുക. കാരണം അവ അഴുക്ക്, പ്രാണികൾ, രാസവസ്തുക്കൾ എന്നിവ കൂടുതലായി പറ്റി പിടിച്ചിരിക്കുന്ന ഇടമാണ്.

കാബേജ് പകുതിയായോ നാലായിട്ടോ മുറിക്കുക. ഇത് പാളികൾ തുറക്കാൻ സഹായിക്കുകയും മറഞ്ഞിരിക്കുന്ന പുഴുക്കളെ എളുപ്പത്തിൽ കണ്ടെത്തുകയും ചെയ്യുന്നു.

ശേഷം ക്യാബേജ് ചെറുചൂടുള്ള ഉപ്പുവെള്ളത്തിൽ 10-15 മിനിറ്റ് നേരം മുക്കിവയ്ക്കുക. ഉപ്പ് പുഴുക്കളെ ഇല്ലാതാക്കാനും മറഞ്ഞിരിക്കുന്ന പ്രാണികളെ പുറത്തുകൊണ്ടുവരാനും സഹായിക്കും.

ശേഷം ഒരു പാത്രം വെള്ളത്തിൽ 1-2 ടേബിൾ സ്പൂൺ വിനാഗിരി ചേർത്ത് ക്യാബേജ് 5-7 മിനിറ്റ് മുക്കിവയ്ക്കുക. വിനാഗിരി ബാക്ടീരിയകളെ കൊല്ലാൻ സഹായിക്കുകയും ഇലകളിൽ നിന്ന് പുഴുക്കളെ വേർപെടുത്താനും സഹായിക്കും.

ക്യാബേജ് 2-3 തവണ കഴുകിയാൽ പുഴുക്കൾ, ഉപ്പ്, അഴുക്ക് അല്ലെങ്കിൽ വിനാഗിരി എന്നിവ കഴുകി കളയാം. ക്യാബേജ് പൂർണ്ണമായും വൃത്തിയുള്ളതാണെന്ന് ഉറപ്പാക്കാൻ ഇലകൾ വേർതിരിച്ച് ശേഷിക്കുന്ന ഏതെങ്കിലും പ്രാണികൾ ഉണ്ടോയെന്ന് പരിശോധിക്കുക.