പ്രശസ്ത സംവിധായിക ഫറാ ഖാൻ തന്റെ യൂട്യൂബ് വ്ലോഗിനായി കേന്ദ്രമന്ത്രി നിതിൻ ഗഡ്കരിയുടെ വസതി സന്ദർശിച്ചു. സംഭാഷണങ്ങൾക്കിടെ, റോഡ് വികസനത്തിനായി സ്വന്തം ഭാര്യാപിതാവിന്റെ വീട് പൊളിച്ചുനീക്കിയെന്ന ഗഡ്കരിയുടെ വെളിപ്പെടുത്തൽ ഫറയെ അക്ഷരാർത്ഥത്തിൽ ഞെട്ടിച്ചു.
ന്യൂഡൽഹി: പ്രശസ്ത ബോളിവുഡ് സംവിധായികയും കൊറിയോഗ്രാഫറുമായ ഫറാ ഖാന്റെ ഏറ്റവും പുതിയ യൂട്യൂബ് വ്ലോഗ് ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. ഇത്തവണ കേന്ദ്ര ഗതാഗത മന്ത്രി നിതിൻ ഗഡ്കരിയുടെ ഡൽഹിയിലെ വസതിയിലാണ് ഫറാ ഖാനും കുക്കായ ദിലീപും അതിഥികളായെത്തിയത്. രാഷ്ട്രീയത്തിന് പുറമെയുള്ള ഗഡ്കരിയുടെ വ്യക്തിജീവിതത്തെക്കുറിച്ചും വിവാഹത്തെക്കുറിച്ചുമുള്ള രസകരമായ സംഭാഷണങ്ങളാണ് വ്ലോഗിൽ ഉൾപ്പെടുത്തിയിരിക്കുന്നത്.
വിവാഹം കഴിഞ്ഞിട്ട് എത്ര വർഷമായെന്ന ഫറയുടെ ചോദ്യത്തിന് മറുപടി നൽകാൻ ഗഡ്കരി അൽപ്പം വൈകിയപ്പോൾ, ഒരു സാധാരണ പുരുഷനെപ്പോലെ മന്ത്രിയും വിവാഹവാർഷികം മറന്നുപോയി എന്ന് ഫറ തമാശരൂപേണ പറഞ്ഞു. എന്നാൽ തങ്ങൾ വിവാഹിതരായിട്ട് 41 വർഷമായെന്ന് അദ്ദേഹത്തിന്റെ ഭാര്യ കാഞ്ചൻ ഗഡ്കരി ഉടൻ തന്നെ തിരുത്തി നൽകുകയും തുടർന്ന് മന്ത്രി വിവാഹ തീയതി കൃത്യമായി ഓർത്തെടുക്കുകയും ചെയ്തു.
വൈറലായ വെളിപ്പെടുത്തൽ
സംഭാഷണത്തിനിടെ റോഡ് വികസനവുമായി ബന്ധപ്പെട്ട് നിതിൻ ഗഡ്കരി നടത്തിയ വെളിപ്പെടുത്തലുകൾ ഫറയെ അക്ഷരാർത്ഥത്തിൽ ഞെട്ടിച്ചു കളഞ്ഞു. തന്റെ ഗ്രാമത്തിൽ ഒരു ചെറിയ റോഡ് പണിയണമെന്ന് ഫറയുടെ കുക്കായ ദിലീപ് മന്ത്രിയോട് അഭ്യർത്ഥിച്ചപ്പോഴാണ് രസകരമായ ചർച്ചകൾക്ക് തുടക്കമായത്. റോഡ് വീതി കൂട്ടുന്നതിനായി സ്വന്തം ഭാര്യാ പിതാവിന്റെ വീട് പോലും താൻ പൊളിച്ചുനീക്കിയിട്ടുണ്ടെന്ന് ഗഡ്കരി വെളിപ്പെടുത്തി. റോഡ് നിർമ്മാണത്തിന് തടസമായതിനാലാണ് കടുത്ത നടപടി സ്വീകരിച്ചതെന്നും പുതിയ വീട് വെച്ചു നൽകുന്നതിന് പകരം നിയമപരമായ നഷ്ടപരിഹാരം മാത്രമാണ് നൽകിയതെന്നും അദ്ദേഹം ശാന്തനായി പറഞ്ഞു. നിയമത്തിന് മുന്നിൽ വിട്ടുവീഴ്ചകളില്ലെന്ന മന്ത്രിയുടെ ഈ നിലപാട് കേട്ട് അമ്പരപ്പോടെ ഇരിക്കുന്ന ഫറയെ വ്ലോഗിൽ കാണാം.
Related Articles
കൊൽക്കത്ത സന്ദർശനത്തിനിടെ ഉണ്ടായ മറ്റൊരു സംഭവവും മന്ത്രി പങ്കുവെച്ചു. അവിടുത്തെ ഒരു റെസ്റ്റോറന്റിലെ ചൈനീസ് ഭക്ഷണം ഇഷ്ടപ്പെട്ട താൻ, തന്റെ പാചകക്കാരനെ അത് പഠിപ്പിക്കണമെന്ന് റെസ്റ്റോറന്റ് അധികൃതരോട് ആവശ്യപ്പെട്ടു. എന്നാൽ നയങ്ങൾ ചൂണ്ടിക്കാട്ടി അവർ അത് നിരസിച്ചു. തുടർന്ന് ആ റെസ്റ്റോറന്റ് ഇരിക്കുന്ന സ്ഥലം കൊൽക്കത്ത പോർട്ട് ട്രസ്റ്റിന്റേതാണെന്നും താനാണ് ഷിപ്പിംഗ് മന്ത്രിയെന്നും ഓർമ്മിപ്പിച്ച ഗഡ്കരി, സഹകരിച്ചില്ലെങ്കിൽ പാട്ടം റദ്ദാക്കുമെന്ന് തമാശ കലർന്ന ഭീഷണി മുഴക്കിയതോടെ അവർ വഴങ്ങിയെന്നും അദ്ദേഹം കൂട്ടിച്ചേർത്തു. സിനിമയിലും ഒടിടി പ്ലാറ്റ്ഫോമുകളിലും സജീവമായ ഫറ ഖാൻ, തന്റെ വ്ലോഗിലൂടെ രാഷ്ട്രീയത്തിലെയും കലയിലെയും പ്രമുഖരുടെ ഇതുവരെ കാണാത്ത വശങ്ങളാണ് പ്രേക്ഷകരിലേക്ക് എത്തിക്കുന്നത്.
