'നിരന്തരം കുറ്റകൃത്യങ്ങളിൽ ഏർപ്പെട്ടിരുന്ന സാമൂഹിക വിരുദ്ധൻ'; കാപ്പ നിയമപ്രകാരം യുവാവിനെ നാടുകടത്തി കൊച്ചി പൊലീസ്

കൊച്ചി: സിറ്റി പരിധിയിൽ നിരന്തരം കുറ്റകൃത്യങ്ങളിൽ ഏർപ്പെട്ടിരുന്ന സാമൂഹിക വിരുദ്ധനെ കാപ്പ (KAAPA) നിയമപ്രകാരം നാടുകടത്തി. കളമശ്ശേരി തൃക്കാക്കര നോർത്ത് വില്ലേജിൽ ഗ്ലാസ് ഫാക്ടറി കോളനി ആറുകണ്ടത്തിൽ വീട്ടിൽ ജോയൽ ബെന്നിയെ (25) ആണ് ഒരു വർഷത്തേക്ക് കൊച്ചി സിറ്റി പൊലീസ് പരിധിയിൽ നിന്ന് നാടുകടത്തിയത്. കൊച്ചി സിറ്റി കമ്മീഷണർ കാളിരാജ് മഹേഷ് കുമാറിന്റെ ഉത്തരവ് പ്രകാരമാണ് ഈ നടപടി. പൊതുജനങ്ങളുടെ സമാധാന ജീവിതത്തിന് സ്ഥിരം ഭീഷണിയായ ഇയാൾക്കെതിരെ നിരവധി കേസുകൾ നിലവിലുണ്ടെന്ന് പൊലീസ് പറയുന്നു.

കാപ്പ നിയമപ്രകാരമുള്ള നാടുകടത്തൽ ഉത്തരവ് നിലനിൽക്കുന്ന അടുത്ത ഒരു വർഷത്തേക്ക് കൊച്ചി സിറ്റി പോലീസ് പരിധിയിൽ പ്രവേശിക്കാനോ ഏതെങ്കിലും വിധത്തിലുള്ള പ്രവർത്തനങ്ങളിൽ ഏർപ്പെടാനോ ജോയൽ ബെന്നിക്ക് അനുവാദമില്ല. ഈ നാടുകടത്തൽ ഉത്തരവ് ലംഘിക്കുന്നത് മൂന്ന് വർഷം വരെ തടവ് ശിക്ഷ ലഭിക്കാവുന്ന കുറ്റമാണെന്നും പൊലീസ് വ്യക്തമാക്കുന്നു. നഗരത്തിൽ സാമൂഹിക വിരുദ്ധ പ്രവർത്തനങ്ങളിൽ ഏർപ്പെടുന്നവർക്കെതിരെ വരും ദിവസങ്ങളിലും ശക്തമായ നടപടികൾ തുടരുമെന്ന് പോലീസ് കമ്മീഷണർ അറിയിച്ചു.