അന്റാർട്ടിക്കയിലെ മക്മുർഡോ ഡ്രൈ വാലിസിലെ രക്തവെള്ളച്ചാട്ടം നൂറ്റാണ്ടുകളായി ശാസ്ത്രലോകത്തെ അമ്പരപ്പിക്കുന്നു. ടെയ്ലർ ഹിമാനിക്കടിയിലെ ഇരുമ്പ് സമ്പുഷ്ടമായ ഉപ്പുവെള്ളം പുറത്തേക്ക് ഒഴുകി ഓക്സിജനുമായി ചേരുമ്പോഴാണ് ഈ ചുവപ്പ് നിറം ഉണ്ടാകുന്നത്.
ഭൂമിയിലെ ഏറ്റവും തണുപ്പുള്ള പ്രദേശമായ അന്റാർട്ടിക്കയിലെ മക്മുർഡോ ഡ്രൈ വാലിസിൽ ശാസ്ത്രലോകത്തെ അമ്പരപ്പിച്ച രക്തവെള്ളച്ചാട്ടത്തിന് പിന്നിലെ യഥാര്ഥ കാരണം പുറത്ത്. ഹിമാനികൾക്കിടയിലൂടെ താഴേക്ക് പതിക്കുന്ന കടും ചുവപ്പ് നിറത്തിലുള്ള വെള്ളച്ചാട്ടത്തിന്റെ രഹസ്യം കഴിഞ്ഞ 100 വർഷമായി അനാവരണം ചെയ്യാൻ ശ്രമിക്കുകയായിരുന്നുവെന്ന് അന്റാർട്ടിക്ക ജേണൽ റിപ്പോർട്ട് ചെയ്യുന്നു. ഈ അസാധാരണ പ്രതിഭാസത്തെ അന്റാർട്ടിക്കയുടെ രക്തവെള്ളച്ചാട്ടം എന്നാണ് അറിയപ്പെടുന്നത്.
1911-ൽ ടെറ നോവ പര്യവേഷണ വേളയിൽ ഓസ്ട്രേലിയൻ ജിയോളജിസ്റ്റ് തോമസ് ഗ്രിഫിത്ത് ടെയ്ലറാണ് അന്റാർട്ടിക്കയിലെ രക്തച്ചാട്ടം ആദ്യമായി നിരീക്ഷിച്ചത്. അക്കാലത്ത്, ചുവന്ന ആൽഗകൾ മൂലമാണ് ഇതിന്റെ ചുവപ്പ് നിറമെന്ന് ശാസ്ത്രജ്ഞർ വിശ്വസിച്ചിരുന്നു, എന്നാൽ തുടർന്നുള്ള ഗവേഷണങ്ങൾ വ്യത്യസ്തവും കൂടുതൽ സങ്കീർണ്ണവുമായ കാരണം വെളിപ്പെട്ടു.
ശാസ്ത്രജ്ഞരുടെ അഭിപ്രായത്തിൽ, ടെയ്ലർ ഹിമാനിയുടെ അടിയിലുള്ള വളരെ പഴക്കമേറിയതും ഇരുമ്പ് സമ്പുഷ്ടവുമായ ഒരു തടാകത്തിൽ നിന്നാണ് ഈ ജലം ഉത്ഭവിക്കുന്നത്. രണ്ട് ദശലക്ഷം വർഷത്തിലേറെയായി പുറം ലോകത്തിൽ നിന്ന് പൂർണ്ണമായും ഒറ്റപ്പെട്ടുകിടക്കുന്ന ഈ തടാകത്തിൽ സൂര്യപ്രകാശമോ ശുദ്ധവായുവോ ലഭിക്കുന്നില്ല. ഇക്കാരണത്താൽ സവിശേഷവും ഒറ്റപ്പെട്ടതുമായ അന്തരീക്ഷം സൃഷ്ടിക്കപ്പെട്ടു.
വെള്ളത്തിലെ ഉയർന്ന ഉപ്പിന്റെ അളവ് കൊടും തണുപ്പിൽ പോലും വെള്ളത്തെ ഐസാക്കി മാറ്റുന്നത് തടയുന്നു. ബ്ലഡ് ഫാൾസിന് കീഴിലുള്ള സബ്ഗ്ലേഷ്യൽ തടാകത്തിലെ ഉപ്പിന്റെ അളവ് കടൽ വെള്ളത്തേക്കാൾ മൂന്നിരട്ടി ഉപ്പുരസമുള്ളതും മരവിപ്പിക്കാൻ കഴിയാത്തത്ര ഉപ്പുരസമുള്ളതുമാണ്. ബ്ലഡ് ഫാൾസിനെ പോഷിപ്പിക്കുന്ന സബ്ഗ്ലേഷ്യൽ തടാകം കാൽ മൈൽ ഹിമത്തിനടിയിൽ കുടുങ്ങിക്കിടക്കുന്നു. ഈ ഉപ്പുവെള്ളം ഹിമാനിയുടെ വിള്ളലുകളിൽ നിന്ന് പതുക്കെ പുറത്തേക്ക് ഒഴുകി വായുവിലെ ഓക്സിജനുമായി സമ്പർക്കം പുലർത്തുമ്പോൾ, അതിലുള്ള ഇരുമ്പ് പ്രതിപ്രവർത്തിച്ച് വെള്ളത്തെ ചുവപ്പ് നിറമാക്കി മാറ്റുന്നു. ഈ തടാകം സജീവമായ ഒരു സൂക്ഷ്മജീവ ജീവവ്യവസ്ഥ നിലനിർത്തുന്നുണ്ടെന്നും ഗവേഷണങ്ങൾ തെളിയിച്ചിട്ടുണ്ട്.
