'സഞ്ജുവിനെ തിരിച്ചുവിളിക്കൂ'; ദക്ഷിണാഫ്രിക്കയോടേറ്റ കനത്ത തോൽവിക്ക് പിന്നാലെ തിലകിനും അഭിഷേകിനുമെതിരെ ആരാധകരോഷം

അഹമ്മദാബാദ്: ടി20 ലോകകപ്പിലെ സൂപ്പർ 8 പോരാട്ടത്തിൽ ദക്ഷിണാഫ്രിക്കയോടേറ്റ ദയനീയ തോല്‍വിക്ക് പിന്നാലെ മലയാളി താരം സഞ്ജു സാംസണെ പ്ലേയിംഗ് ഇലവനിലേക്ക് തിരിച്ചുവിളിക്കണമെന്ന ആവശ്യവുമായി ആരാധകർ രംഗത്ത്. സോഷ്യൽ മീഡിയ പ്ലാറ്റ്‌ഫോമുകളിൽ 'Bring Back Sanju Samson' എന്ന ഹാഷ്‌ടാഗ് വൈറലാവുകയാണ്. അഭിഷേക് ശര്‍മയും തിലക് വര്‍മയും ഇഷാന്‍ കിഷനും അടക്കമുള്ള ഇന്ത്യയുടെ മുൻനിര ബാറ്റർമാർ പരാജയപ്പെട്ടതാണ് ആരാധകരെ ചൊടിപ്പിച്ചത്.

ദക്ഷിണാഫ്രിക്ക ഉയർത്തിയ 188 റൺസ് പിന്തുടര്‍ന്ന ഇന്ത്യക്ക് തുടക്കം മുതൽ തന്നെ പിഴച്ചിരുന്നു. 15 ഓവർ പിന്നിടുമ്പോൾ 88 റൺസിന് 8 വിക്കറ്റ് എന്ന നിലയിലേക്ക് ഇന്ത്യ തകർന്നു. ടോപ്പ് ഓർഡറിലെ ഇഷാൻ കിഷൻ, അഭിഷേക് ശർമ്മ, തിലക് വർമ്മ എന്നിവർക്ക് ആകെ നേടാനായത് വെറും 16 റൺസ് മാത്രമാണ്.

പവർപ്ലേ അവസാനിക്കുമ്പോൾ തന്നെ 31 റൺസിന് 3 വിക്കറ്റ് എന്ന നിലയിലായിരുന്നു നിലവിലെ ചാമ്പ്യന്മാരായ ഇന്ത്യ. തുടര്‍ച്ചയായ മൂന്ന് ഡക്കുകള്‍ക്കുശേഷം അഭിഷേക് ശർമ്മ 15 റൺസ് നേടി പുറത്തായപ്പോൾ, ഇഷാൻ കിഷൻ (0), തിലക് വർമ്മ (1) എന്നിവർ വന്ന വേഗത്തിൽ തന്നെ മടങ്ങി.

ഈ സാഹചര്യത്തിലാണ് ടീം മാനേജ്‌മെന്‍റിന്‍റെ സെലക്ഷൻ തീരുമാനങ്ങളെ ചോദ്യം ചെയ്ത് ആരാധകർ രംഗത്തെത്തിയത്. നിർണായക മത്സരങ്ങളിൽ പതറുന്ന ടോപ്പ് ഓർഡറിന് പകരം സഞ്ജുവിനെപ്പോലെ അനുഭവസമ്പത്തുള്ള താരങ്ങളെ ഉൾപ്പെടുത്തണമെന്നാണ് പ്രധാന ആവശ്യം. വരാനിരിക്കുന്ന സിംബാബ്‌വെക്കും വെസ്റ്റ് ഇൻഡീസിനുമെതിരായ നിർണ്ണായക സൂപ്പര്‍ 8 മത്സരങ്ങളിൽ സഞ്ജുവിനെ പ്ലേയിംഗ് ഇലവനില്‍ ഉൾപ്പെടുത്തുന്നതിനെക്കുറിച്ച് മാനേജ്‌മെന്‍റ് ഗൗരവമായി ആലോചിക്കണമെന്നും ഒരു വിഭാഗം ആരാധകർ വാദിക്കുന്നു.

നിലവിൽ സൂപ്പർ 8 ഘട്ടത്തിൽ ഒരു തോൽവി കൂടി വഴങ്ങിയാൽ ഇന്ത്യയുടെ സെമി സാധ്യതകൾ കൂടുതൽ അപകടത്തിലാകും. ഈ സാഹചര്യത്തിൽ വരും മത്സരങ്ങളില്‍ ടീമിൽ അഴിച്ചുപണികൾ ഉണ്ടാകുമോ എന്നാണ് ക്രിക്കറ്റ് ലോകം ഉറ്റുനോക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക