ചെന്നൈ സൂപ്പർ കിംഗ്സിനെതിരായ മത്സരത്തിൽ ക്യാച്ചെടക്കുന്നതിനിടെ വീണ സാന്റ്നറുടെ തോളിനും കഴുത്തിനും പരിക്കേറ്റിരുന്നു. തുടര്ന്ന് കൺകഷൻ സബ്സ്റ്റിറ്റ്യൂട്ടായി ഷാർദുൽ താക്കൂർ ആണ് സാന്റ്നർക്ക് പകരം ബാറ്റിംഗിനിറങ്ങിയത്.
മുംബൈ: ഐപിഎല്ലിൽ തുടര് തോല്വികള്ക്ക് പിന്നാലെ മുംബൈ ഇന്ത്യൻസിന് വീണ്ടും കനത്ത പ്രഹരം. പരിക്കിനെത്തുടർന്ന് സൂപ്പർ ഓൾറൗണ്ടർ മിച്ചൽ സാന്റ്നർ ടൂർണമെന്റിൽ നിന്ന് പുറത്തായി. ചെന്നൈ സൂപ്പര് കിംഗ്സിനെതിരായ മത്സരത്തിനിടെ കാര്ത്തിക് ശര്മയുടെ ക്യാച്ചെടുക്കുന്നതിനിടെയാണ് സാന്റ്നറുടെ തോളിന് പരിക്കേറ്റത്. സാന്റ്നറുടെ പകരക്കാരനായി ദക്ഷിണാഫ്രിക്കയുടെ ഇടം കൈയൻ സ്പിന്നർ കേശവ് മഹാരാജിനെ 75 ലക്ഷം രൂപയ്ക്ക് മുംബൈ ടീമിലെത്തിച്ചിട്ടുണ്ട്.
ചെന്നൈ സൂപ്പർ കിംഗ്സിനെതിരായ മത്സരത്തിൽ ക്യാച്ചെടക്കുന്നതിനിടെ വീണ സാന്റ്നറുടെ തോളിനും കഴുത്തിനും പരിക്കേറ്റിരുന്നു. തുടര്ന്ന് കൺകഷൻ സബ്സ്റ്റിറ്റ്യൂട്ടായി ഷാർദുൽ താക്കൂർ ആണ് സാന്റ്നർക്ക് പകരം ബാറ്റിംഗിനിറങ്ങിയത്. ഏപ്രിൽ ആദ്യ വാരം ഡൽഹിക്കെതിരായ മത്സരത്തിലും സാന്റ്നറുടെ തോളിൽ പരിക്കേറ്റിരുന്നു. പിന്നീട് തിരിച്ചെത്തിയെങ്കിലും ചെന്നൈക്കെതിരായ മത്സരത്തിൽ അതേ തോളിൽ തന്നെ വീണ്ടും പരിക്കേറ്റത് വിനയായി. സാന്റ്നറുടെ പകരക്കാരനായി വരുന്ന കേശവ് മഹാരാജ് 2024 സീസണിൽ രാജസ്ഥാൻ റോയൽസിന് വേണ്ടി ഐപിഎല്ലിൽ കളിച്ചിട്ടുണ്ട്. ന്യൂസിലൻഡിനെതിരായ ടി20 പരമ്പരയിലെ മികച്ച പ്രകടനമാണ് മഹാരാജിനെ മുംബൈ ടീമിലെത്തിക്കാന് കാരണമായത്.
സീസണിൽ ഇതുവരെ മികച്ച ഫോമിലേക്ക് ഉയരാൻ സാധിക്കാത്ത മുംബൈ ഇന്ത്യൻസ് പോയിന്റ് പട്ടികയിൽ ഒമ്പതാം സ്ഥാനത്താണ്. ചെന്നൈക്കെതിരായ കഴിഞ്ഞ മത്സരത്തിൽ 208 റൺസ് പിന്തുടർന്ന മുംബൈ 103 റൺസിന്റെ കനത്ത തോൽവിയാണ് ഏറ്റുവാങ്ങിയത്. സാന്റ്നറുടെ അഭാവം ടീമിന്റെ ബൗളിംഗ്-ബാറ്റിംഗ് സന്തുലിതാവസ്ഥയെ ബാധിക്കുമെന്ന ആശങ്കയിലാണ് ആരാധകർ. സീസണിലെ മോശം പ്രകടനത്തിൽ നിന്ന് കരകയറാൻ ശ്രമിക്കുന്ന മുംബൈ നാളെ കരുത്തരായ ഹൈദരാബാദിനെയാണ് നേരിടുന്നത്.
