- Home
- Sports
- Cricket
- വൈഭവ് വീണു, ഓറഞ്ച് ക്യാപ്പിന് പുതിയ അവകാശി, ടോപ് 10 മാറിമറിഞ്ഞു, പോയന്റ് പട്ടികയിലും മാറ്റം, തോല്ക്കാത്തവരായി ഇനി പഞ്ചാബ് മാത്രം
വൈഭവ് വീണു, ഓറഞ്ച് ക്യാപ്പിന് പുതിയ അവകാശി, ടോപ് 10 മാറിമറിഞ്ഞു, പോയന്റ് പട്ടികയിലും മാറ്റം, തോല്ക്കാത്തവരായി ഇനി പഞ്ചാബ് മാത്രം
സീസണില് എല്ലാ ടീമുകളും 4 മത്സരം പൂര്ത്തിയാക്കിയപ്പോള് ഇതുവരെ ജയിക്കാത്തവര് കൊല്ക്കത്ത മാത്രമാണ്.
ഓറഞ്ച് ക്യാപിന് പുതിയ അവകാശി
ഐപിഎല് ഓറഞ്ച് ക്യാപ്പിന് പുതിയ അവകാശിയെത്തി. ഇന്നലെ നടന്ന രാജസ്ഥാൻ റോയല്സ്-സണ്റൈസേഴ്സ് ഹൈദരാബാദ് പോരാട്ടം കഴിഞ്ഞതോടെ 200 റണ്സുമായി ഓറഞ്ച് ക്യാപ് സ്വന്തമാക്കിയിരുന്ന രാജസ്ഥാന് കൗമാര താരം വൈഭവ് സൂര്യവംശിക്ക് ഓറഞ്ച് ക്യാപ് നഷ്ടമായി.
ക്ലാസ് ക്ലാസന്
രാജസ്ഥാന് റോയല്സിനെതിരെ ഹൈദരാബാദിനായി 26 പന്തില് 40 റൺസെടുത്ത് തിളങ്ങിയ ഹെന്റിച്ച് ക്ലാസനാണ് ഓറഞ്ച് ക്യാപ്പിന്റെ പുതിയ അവകാശി. 5 കളികളില് 224 റണ്സുമായാണ് ക്ലാസൻ ഓറഞ്ച് ക്യാപ് സ്വന്തമാക്കിയത്. 44.80 ശരാശരിയിലും 142.68 സ്ട്രൈക്ക് റേറ്റിലുമാണ് ക്സാസന്റെ ബാറ്റിംഗ്.
കുതിച്ച് കിഷനും
ഇന്നലെ രാജസ്ഥാനെതിരെ വെടിക്കെട്ട് ബാറ്റിംഗിലൂടെ 91 റണ്സുമായി തിളങ്ങിയ ഇഷാന് കിഷന് റണ്വേട്ടക്കാരില് രണ്ടാം സ്ഥാനത്തേക്ക് ഉയര്ന്നു. 5 മത്സരങ്ങളില് 213 റണ്സുമായാണ് ഇഷാന് കിഷന് രണ്ടാം സ്ഥാനത്തേക്ക് ഉയര്ന്നത്. 42.60 ശരാശരിയുള്ള കിഷന് 190.18 സ്ട്രൈക്ക് റേറ്റുണ്ട്.
വൈഭവ് മൂന്നാമൻ
ഹൈദരാബാദിനെതിരെ നേരിട്ട ആദ്യ പന്തില് പുറത്തായി ഗോള്ഡന് ഡക്കായ രാജസ്ഥാന് താരം വൈഭവ് സൂര്യവംശി 5 കളിയില് 200 റണ്സുമായി മൂന്നാം സ്ഥാനത്തേക്ക് വീണു. 40 ശരാശരിയുള്ള വൈഭവിന് പക്ഷെ 263.16 എന്ന മാരകപ്രഹരശേഷിയുമുണ്ട്.
ടോപ് ത്രീയില് നിന്ന് ജുറെലും ജയ്സ്വാളും പുറത്ത്
ഇന്നലെ ഹൈദരാബാദിനെതിരെ ഒരു റണ്സ് മാത്രമെടുത്ത് പുറത്തായ യശസ്വി ജയ്സ്വാളും ഡക്കായി മടങ്ങിയ ധ്രുവ് ജുറെലും ടോപ് ത്രീയില് നിന്ന് പുറത്തായി.ജയ്സ്വാള് അഞ്ചാം സ്ഥാനത്തേക്ക് വീണപ്പോള് ജുരെല് എട്ടാമനായി.
മാറ്റമില്ലാതെ സഞ്ജു
ടോപ് 10 മാറി മറിഞ്ഞെങ്കിലും പതിനാലാം സ്ഥാനത്തുള്ള സഞ്ജുവിന്റെ സ്ഥാനത്തിന് ഇളക്കമില്ല. നാലു കളികളില് 137 റണ്സെടുത്തിട്ടുള്ള സഞ്ജുവിന് ഇന്ന് കൊല്ക്കത്തക്കെതിരെ തിളങ്ങിയാല് ടോപ് 10ല് എത്താന് അവസരമുണ്ട്.
പോയന്റ് പട്ടികയിലും മാറ്റം
ഹൈദരാബാദിനെതിരെ തോറ്റെങ്കിലും രാജസ്ഥാന് തന്നെയാണ് പോയന്റ് പട്ടികയില് ഒന്നാം സ്ഥാനത്ത്. 8 പോയന്റുമായാണ് രാജസ്ഥാന് ഒന്നാം സ്ഥാനത്ത് തുടരുന്നത്. അതേസമയം സീസണിലെ രണ്ടാം ജയത്തോടെ ഹൈദരാബാദ് നാലാം സ്ഥാനത്തേക്ക് കുതിച്ചു.
ജയിക്കാത്തവരായി കൊല്ക്കത്തയും തോല്ക്കാത്തവരായി പഞ്ചാബും
സീസണില് എല്ലാ ടീമുകളും 4 മത്സരം പൂര്ത്തിയാക്കിയപ്പോള് ഇതുവരെ ജയിക്കാത്തവര് കൊല്ക്കത്ത മാത്രമാണ്. പഞ്ചാബിനെതിരായ മത്സരം മഴ കൊണ്ടുപോയതിനാല് ലഭിച്ച ഒരു പോയന്റ് മാത്രമാണ് കൊല്ക്കത്തക്കുള്ളത്. അതേസമയം ഇന്നലെ രാജസ്ഥാന് തോറ്റതോടെ ഇനി തോല്വി അറിയാത്തവരായി പഞ്ചാബ് മാത്രമാണുള്ളത്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!
