വാട്സ്ആപ്പ് വെബ് ഉപയോക്താക്കൾക്കായി 'ചാറ്റ് തീമുകൾ' എന്ന പുതിയ ഫീച്ചർ അവതരിപ്പിക്കുന്നു. ഇത് വഴി മെസേജ് ബബിളുകളുടെ നിറം മാറ്റാനും ഓരോ ചാറ്റിനും വ്യത്യസ്ത തീമുകൾ നൽകാനും സാധിക്കും. ഈ മാറ്റം ചാറ്റുകൾക്ക് കൂടുതൽ ദൃശ്യഭംഗിയും വ്യക്തിഗത രൂപകൽപ്പനയും നൽകും.
കാലിഫോര്ണിയ: ജനപ്രിയ മെസേജിംഗ് പ്ലാറ്റ്ഫോമായ വാട്സ്ആപ്പ് അവരുടെ വെബ് പതിപ്പില് വമ്പൻ മാറ്റങ്ങൾ കൊണ്ടുവരുന്നു. ഐഒഎസ്, ആൻഡ്രോയ്ഡ് പ്ലാറ്റ്ഫോമുകളിൽ നിരന്തരം പുതിയ സവിശേഷതകൾ അവതരിപ്പിക്കുന്ന കമ്പനി ഇപ്പോൾ വാട്സ്ആപ്പ് വെബ് ഉപയോക്താക്കൾക്കായി കൂടുതൽ കസ്റ്റമൈസേഷൻ സൗകര്യങ്ങൾ ഒരുക്കുകയാണ്. ഇതിന്റെ ഭാഗമായി വാട്സ്ആപ്പ് വെബില് 'ചാറ്റ് തീമുകൾ' എന്ന ഫീച്ചർ ഉടൻ അവതരിപ്പിക്കപ്പെടും.
വാട്സ്ആപ്പ് വെബില് പുത്തന് 'ചാറ്റ് തീമുകൾ'
വാട്സ്ആപ്പ് ഫീച്ചര് ട്രാക്കറായ വാബീറ്റാ ഇൻഫോ പുറത്തുവിട്ട വിവരങ്ങൾ പ്രകാരം, ഉപയോക്താക്കൾക്ക് വാട്സ്ആപ്പ് വെബിൽ ഒരു ഡീഫോൾട്ട് ചാറ്റ് തീം തിരഞ്ഞെടുക്കാൻ സാധിക്കും. ഈ തീമുകൾ വഴി മെസേജ് ബബിളുകളുടെ നിറം മാറ്റാനും അതിനൊത്ത വാൾപേപ്പറുകൾ ഉപയോഗിക്കാനും കഴിയും. ഇതോടെ ചാറ്റുകളുടെ ദൃശ്യഭംഗി കൂടുതൽ മെച്ചപ്പെടുകയും വ്യക്തിഗത ഇഷ്ടാനുസൃത രൂപകൽപ്പന സാധ്യമാവുകയും ചെയ്യും.
ഇപ്പോൾ വാട്സ്ആപ്പ് വെബിൽ ലഭ്യമായ കസ്റ്റമൈസേഷൻ പരിമിതമാണ്. ഉപയോക്താക്കൾക്ക് ഒരു സാധാരണ വാൾപേപ്പർ സജ്ജീകരിക്കാനും ചെറിയ ഡൂഡിൽ ഓവർലേകൾ ചേർക്കാനും മാത്രമാണ് നിലവിൽ സാധിക്കുന്നത്. പുതിയ ചാറ്റ് തീമുകളുടെ വരവോടെ ഈ കുറവ് പരിഹരിക്കപ്പെടുകയും മൊബൈൽ ആപ്പുകളിലെ അനുഭവം വെബ് പതിപ്പിലും ലഭ്യമാകുകയും ചെയ്യും എന്നാണ് റിപ്പോർട്ടുകൾ. കൂടാതെ, ഓരോ ചാറ്റിനും വ്യത്യസ്ത തീമുകൾ നൽകാനുള്ള സൗകര്യവും ഉൾപ്പെടുത്തുന്നുണ്ട്. വ്യക്തിഗത ചാറ്റുകൾ, ജോലിസംബന്ധമായ സംഭാഷണങ്ങൾ, ഗ്രൂപ്പ് ചാറ്റുകൾ എന്നിവയെ വ്യത്യസ്ത നിറങ്ങളിലും ശൈലികളിലും ക്രമീകരിക്കാനാകുന്നതിലൂടെ ഉപയോക്താക്കൾക്ക് ചാറ്റുകൾ തിരിച്ചറിയാൻ കൂടുതൽ എളുപ്പമാകും.
Related Articles
49 വ്യത്യസ്ത ചാറ്റ് തീമുകള്
ഇതിനായി വാട്സ്ആപ്പ് 49 വരെ വ്യത്യസ്ത തീം വകഭേദങ്ങൾ പരീക്ഷിക്കുന്നതായാണ് റിപ്പോർട്ടുകൾ. നീല നിറത്തിന്റെ വിവിധ ഷേഡുകൾ ഉൾപ്പെടെ പല നിറങ്ങളിലും ടോണുകളിലും തീമുകൾ ലഭ്യമാകും. ഉപയോക്താക്കൾക്ക് കൂടുതൽ വ്യക്തിഗത ഇഷ്ടാനുസൃതത നൽകുകയാണ് ഇതിന്റെ ലക്ഷ്യം. പ്രധാനമായി, ഈ തീമുകൾ സ്വകാര്യമായിരിക്കും; അതാത് ഒരാൾ ചെയ്യുന്ന മാറ്റങ്ങൾ മറ്റുള്ളവർക്കു കാണാൻ സാധിക്കില്ല.
ഇപ്പോൾ വികസന ഘട്ടത്തിലുള്ള ഈ ഫീച്ചർ ആദ്യം ബീറ്റാ ഉപയോക്താക്കൾക്ക് ലഭ്യമാക്കും. പിന്നീട് പൊതുജനങ്ങൾക്ക് ലഭ്യമാക്കും എന്നാണ് റിപ്പോർട്ടുകൾ. ഇതിന് പുറമെ, ഫോൺ നമ്പർ പങ്കിടാതെ തന്നെ യൂസർനെയിം ഉപയോഗിച്ച് വാട്സ്ആപ്പ് അക്കൗണ്ട് ഉടമകളെ ആളുകള്ക്ക് കണക്റ്റ് ചെയ്യാനുള്ള പുതിയ ഫീച്ചറും വാട്സ്ആപ്പ് പരീക്ഷിക്കുന്നതായി റിപ്പോർട്ടുകൾ വ്യക്തമാക്കുന്നു. ഇത് സുരക്ഷയും സ്വകാര്യതയും വർധിപ്പിക്കും എന്നാണ് പ്രതീക്ഷിക്കുന്നത്.
